"في دهاليز القطب القضائي !" مقتطفات من رواية "الفينقة" للاستاذ انيس الزين المحامي

 القطب القضائي محكمة خاصة برشة، تحسّ روحك و انت داخل كاينك داخل لڤزرنة من كثرة الاحتياطات الأمنية و التدقيق ،و تقريبا ما فما حتى واحد غريب و الا متطفل ينجّم يدور في أحواز القطب .
عندي تقريب ساعتين نستنى بين قاعة المحامين و مكتب الضبط ، و بعد مشيت سألت زميل إلّى نصحني باش ما نقلقش لأنو السماعات عند التحقيق ما تبدى كان العشية.
طلعت للسيد وكيل الجمهورية وطلبت منو باش يجاوبني على سؤال واحد" وقتاش باش يجيبوها" ،قال لي استناني ربع ساعة تو نطلبوك .
هبطت لقاعة المحامين مازلت كيف قعدت عالكرسي ،طلبوني و قالولي المتهمة وصلت ، وسيقع عرضها مع الملف حالا .
بعد تقريب ساعة ، مشيت لمكتب الضبط، و لقيت الّي وقع تعهيد عميد قضاة التحقيق بالملفّ استغربت و زدت استغربت أكثر بعد ما عرفت الّي القضية ولات زوز قضايا و الملف ولّى زوز ملفات ، واحد في قطب الاٍرهاب و الثاني في القطب المالي ، الحاصل التعب باش يهبط على ظهر المحامي لا اكثر و لا اقل ، و يظهرلي باش يتعبني الملف هذا و يضيعلي خدمتي في سوسة ، أما انا وعدتها و وعدت غسَّان باش ناقف معاها و أهمّ من هذا الكلّ، انا خذيت عهد على روحي ملّي أديت يمين المحاماة باش ما نخلِّيش بحد قصدني باش نعاونو يثبت حقّو و الا يرجعو حتى كيف يبدا على صحتي و تعبي .
مع قريب الثلاثة متع العشية وصلت باش نصوّر الملف ، ملف كبير بالأوراق الفارغة و تقريب ما فيه شيء كان مجرد تصريحات من ملفات قديمة وقع ذكر اسم مريم الدريدي و في اغلبها جاء اسمها عرضيا ، و اغلب الّي ذكروا مريم كانوا يسمعوا بالاسم من غير ما يعرفوا الشخص معناه حتى المكافحة ما عندهاش معنى ...
أنا نستنّى باش يطلعوا مريم للتحقيق و نحضر معاها و فمّا نومرو يمكن طلبني عشرة مرّات قرّرت في الاخر باش نهزّ عليه :
- آلو آلو يا سي الأستاذ
صوت مرا فيه غصَّة ، جاوبتها :
- تفضّل يا مادام الأستاذ ، لاباس؟
- ولدي لطفي جاوا الحرس هزّوه مالقهوة .
- سامحني شكون لطفي؟ وانت شكون يا مادام .
- أنا أمّ زينب، موش المحامي متع سوسة ؟
- أي أي، وشكون لطفي؟
- لطفي خو زينب الصغير و حتّى غسَّان جاوا هزّوه من دارهم البارح في الليل .
الأمور بدات تتعقّد، أمّا توّا نتلهى بالملف الّي قدامي قبل و لكلّ حادث حديث ، قلتلها بعد شويّة نطلبك، خلّي تاليفونك محلول، و دخلت للتحقيق بعد ما البوليسية دخلوا زينب وانا لاهي نحكي في التليفون .
خزرتلها في وجهها حسّيتها حاضرة و ثابتة،سلِّمت على السيّد قاضي التحقيق، وطلبت منّو أَنِّي نكلّم منوّبتي خارج البحث ، بما أنّي ما خلاونيش ننفرد بيها من نهار الّي توقّفت .
قاضي التحقيق ، كان راجل وقور و مليان قانون و إنسانية ، و قال لي تفضّل أستاذ ، تحدّث معاها و انا احسبني مانيش موجود هذا حقها في الدفاع.
قربت لمريم و قلتلها :
- ما تخبي شيء ، قول كلّ شيء و ما تكذبش احكيلو الصحيح اسمك زينب و الباقي انت تعرفو خير .
خزرت في عينيّ و كاينّي ماهيش مصدّقة الّي قلتهولها و قبل ما تجاوبني قلتلها :
- عندك ثقة فيّ؟
- بالطبيعة عندي ثقة فيك .
رجعت لبلاصتي قعدت عالكرسي متاعي و بدا التحقيق و في بدايتو وفا بالنسبة ليّ بعد ما صادقت على هُوِيَّتها كيما حات في المحاضر و في قرار فتح البحث الّي هي مريم و الّي مشات لليبيا بحذا راجلهاالّي كان هارب عالشيكات.
حسّيت راسي فوّر بالسخانة خمّمت باش نقاطعها ونقاطع الاستنطاق وبعد قعدت في بلاصتي نسمع في مرا تتحدث واثقة من روحها و من صيفتها ومالاحداث الّي عاودتها مرتّبة ، و كانت في كلّ مرّة تختم جوابها بمستعدّة نواجه أي واحد يقول غير كلامي .
كمّل التحقيق السماع ، وأعطاني الكلمة ، وأنا ببداهة المحامي قرّرت أَنِّي نساند منوّبتي في تصريحاتها خاصة و أنّ الملف ما فيهوش حاجة تؤكّد إدانتها في أي مالأفعال المنسوبة ليهاً الّي بموجبها فتحت النيابة العمومية البحث التحقيقي ضدّ منوّبتي .
و بديت نناقش في تصريحات بعض المتهمين في قضايا جانبية الّي جا على لسانهم كون مريم كانت تقوم بتسفير الفتيات إلى سوريا برّا على ليبيا في مرحلة أولى و جوّا عبر اسطنبول ، كنت نرافع و مانحسّش في روحي قاعد نبدع لسبب بسيط الّي انا مانيش مقتنع والمحامي كيف يبدا موش مقتنع بقضية صعيب يقنع بيها القاضي و ختمت مرافعتي بطلب حفظ جملة التهم في حقها و احتياطيا إبقاءها بحالة سراح ، و تفاجأت أنّو السيّد قاضي التحقيق يقرر ابقاءها بحالة سراح .
طرت مالفرحة و مشيتلها قلتلها، مازال ملفي القطب المالي ربّي يسهّل وتتسيّب فيه زادة، من غير ما فرحت و لا حزنت ،قالتلي :
- الّي يقدّر بيه ربّي يصير أستاذ، وينو غسّان؟
- ماكش فرحانة ؟
- على شنّوا فرحانة ؟ على جمعة ملوِّحة من غير دوش، تعرف شنوّا معناه مرا تقعد جمعة لحمها مخزّز بالوسخ؟ وينو غسَّان ؟
و قبل ما نجاوبها هزّوها زوز أعوان بعد ما أشارولي باش نخلط عليها للقطب المالي ...

*العنوان من اختيار الموقع والنص منشور بالصفحة الخاصة للمؤلف بالفيسبوك

 

للمشاركة في الدورات التكوينية

الدورة التكوينية

تاريخ الدورة

الرابط

التحكيم التجاري الدولي وفق قواعد غرفة التجارة الدولية

28 أكتوبر 2017

هنا

الجوانب الاجرائية والتطبيقية للتصرف الفعال في ملفات التحكيم التجاري الدولي

18 نوفمبر 2017

هنا

الانقليزية القانونية

من 27 نوفمبر 2017 الى غاية 30 ديسمبر 2017

هنا

 

 

 

 

 
قيم الموضوع
(1 تصويت)
  • آخر تعديل على السبت, 28 تشرين1/أكتوير 2017 11:05
  • حجم الخط

فيديوهات قضاء نيوز

Loading Player...

تابعونا على الفايسبوك



تابعونا على تويتر

خريطة الموقع

للإتصال بنا

العنوان : 29 شارع المنجي سليم باردو

الهاتف : 224 224 71

الفاكس : 244 224 71

البريد الإلكتروني : marsed.kadha.tn@gmail.com